KAGAWASAN, Hain Ka?
Ika-115 nga tuig karong Hunyo 12, 2013 sa giilang kagawasan sa Pilipinas gikan sa pagpanakop sa nasud Espanya bunga sa mabulukong pagpaningkamot ug pakigbisog sa mga nahaunang nagpakabanang katawhan niadtong panahona.
Ang kagawasan alang sa katawhan nga kabus ug nilupigan ug mga nasud nga kabus usa ka kahingpitan sa mga katungod ug kaayuhan niini nga walay pagpanghilabot ug pag-imposar sa kagustuhan ug interes gikan sa langyaw.
Sa kahimtang sa atong nasud karong panahona, baga sa katawhan ang anaa gihapon sa gapos sa kalisod ug kapobrehon ug kapakyas sa pagkab-ot sa ilang mga katungod. Sukwahi kini nga kahimtang sa gipanghinambog sa kagamhanang gidumala ni PNoy nga mitaas kuno sa 7.8% ang nasudnong kita (ekonomiya) sa Pilipinas.
Daku nga hinungdan sa kawalay kagawasan sa katawhan mao ang mismong gambalay sa ekonomiya ug politika sa nasud ug kalibutan. Ang pagpatuman sa PRIVATIZATION, DEREGULATION ug LIBERALISASYON miduot ug samot sa katawhan sa mas alaot nga kahimtang. Kongkretong mga ehemplo niini mao ang pagpasa ug pagpatuman sa mga kontra-katawhang mga balaod sama sa Electric Power Industry Reform Act (EPIRA), Oil Deregulation Law (ODL), Budget Cuts sa mga Serbisyong Sosyal, Privatization sa mga nag-unang industriya ug serbisyo (edukasyon, panglawas, tubig, elektrisidad, ugbp), Balaod sa Mina sa Pilipinas (Philippine Mining Act), 12% Expnaded Value Added Tax (EVAT), pagtugot sa Kontraktwalisasyon nga eskima sa panarbaho, ug uban pa.
Kini nga kahimtang, dayag nga nagbutang sa katawhan sa kawalay kagawasan.
Sa dakbayan sa Iligan, sa walay igong pagpakighinabi sa katawhan, gibaligya sa Lokal nga Kagamhanan ang Iligan Diesel Power Plants (IDPPs) ug dugang pa niini ang pagtugot sa Energy Regulatory Commission nga magtaas ug singil sa kurente ang Iligan Lights and Power ug Mapalad Power Corporation gikan sa 6.53/kwh ngadto sa 9 hangtud 10.31/kwh o kapin kun kulang 3/kwh nga tubo.
Dili makaikyas niini ang kabatan-onan kay sa samang higayon isip mga nahikawan sa katungod nga makatungha nga may igong suporta gikan sa kagamhanan, konsumante usab kini sa sugang dagitabnon ug kabahin sa mga pamilyang nag-ilaid sa tumang kalisod uban pa sa mahal nga mga palaliton.
Wala pa nato gisubay dinhi ang hisgutanang walay puas nga pagtaas sa presyo sa gasolina, krudo ug uban pang produktong petrolyo.
Busa giawhag kita nga mosalmot sa mga katilingbanong hisgot ug kalihukan aron nga mapabati ang atong mga tingog ug baruganan.
Mahal ang Edukasyon!
Mahal ang Kurente!
Mahal ang Palaliton!
KAGAWASAN, HAIN KA?
Liga ng Makabagong Kabataan – Iligan
Email: lmkabataan@yahoo.com.ph
FB: Ligang MakabagongKabataan Ranao
Phone: 221 – 7393
June 10, 2013
