Anak Mindanao (AMIN) endorsed Plataporma sa Yanong Katawhan

Iligan Peoples’ Agenda

Iligan City

30 April 2013

Plataporma  sa Yanong Katawhan

Kaming mga yanong katawhan ug kahugpungan sa katawhan sa Dakbayan sa Iligan nagkahiusa ug moduso niining Plataporma sa Yanong Katawhan.

Mopadayag sa among panawagan sa mga botante sa pagpakig-uban kanamo sa pag-endorso ug pagduso niining maong Plataporma ngadto sa mga politiko niining May 1, 2013 nga piniliay uban sa sinserong pagkonsidera sa mga buhat ug track record apil ang plataporma niini.

Gipanawagan usab ngadto sa mga kandidato nga undangon na ang walay pulos nga pagdinautay panahon sa ilang pagpangampanya hinoon maghatag kini ug duot sa ilang mga plataporma.

Mao kini ang Plataporma sa Yanong Katawhan:

1. Tutok ug igong suporta sa Agrikultura labi na sa dugang subsidyo ug mga kahimanan ug paspas nga pag-construct sa mga kadalanan ngadto sa kabukiran ug uban pang inprastrakturang pang-agrikultura apil na ang hugot nga pagpatuman sa balaod Organikong Panguma ug Pagbungkag sa mga dili makatarunganong sistema sa komprada;

2.   Pagbatok sa Pag-Privatize sa Electric Power Industry ug Pag-basura sa Electric Power Industry Reform Act uban ang Pag-pa-imbestiga sa mga anomalya ug manipulasyon sa industriya sa Elektrisidad ug ang pagbaligya sa Iligan Diesel Power Plant;

3.    Pagpaubos sa presyo sa mga palaliton pinaagi sa pagpabasura sa 12% nga Expanded Value Added Tax sa tanang palaliton pinaagi sa usa ka resolution o baruganan gikan sa local nga kagamhanan;

4. Pagbungkag sa Cartel sa Produktong Petrolyo ug Pagpakunhod sa Presyo pinaagi sa Pagbasura sa Oil Deregulation Law ug pag-Nationalize sa Industriya sa Lana ug proteksyon sa mga katungod sa mga driver ug transport sector,  pagwagtang sa Kutong sa kadalanan ug pagdidisplina sa mga abusadong traffick and police personnel ug ang pagmonitor ug pagsilot sa mga nakalapas sa proseso sa pag-aprobar sa mga prangkisa lakip na ang igong suporta sa mga kahugpungan sa mga driver;

5. Kongkreto nga Sustenableng Panginabuhian alang sa Katawhan. Pagdasig sa local nga komitiba ug ahensya nga maka-umol ug maka-introduce ug panginabuhiang makatarunganon ug makasuporta sa inadlaw-adlaw nga pagkinabuhi sama sa sistemang Urban Container Agriculture, Communal Farms ug mga Cooperative;

6. Pagpasa ug Ordinansa sa hingpit ug hugot nga pagpatuman sa minimum wage ug ang pagseguro sa mga benepisyo ug katungod sa mga mamumuo sa industriya, agrikultura ug serbisyo ug uban pang mga balaudnon nga alang sa mga mamumuo. Uban niini ang hugot nga pag-monitor sa mga private labor agencies ug negosyo sa pagsubay sa mga balaod ug paghatag sa mga benepisyo. Pagsilot sa mga nagbuhat ug Unfair Labor Practices.

7. Paghatag ug igong pagtagad sa Serbisyong Sosyal ug pagseguro niini nga paborable sa katawhan sama sa pagpataas sa gahin niini ug ang pagbatok sa pagprivatize sa kurente, tubig, hospital, petrolyo, edukasyon ug uban pa, gani mas gipanawagan ang pagpatuman sa mga balaod batok sa traffigking of persons, Violence Against Women and Children, paghatag ug patas nga pagtagad diha sa panarbaho  ug paghatag ug serbisyong sosyal labi na sa panglawas; pagduso sa partisipasyon sa mga estudyante ug ginikanan sa paghisgot ug pagpatuman sa pagtaas sa balayranan sa mga tulunghaan; imbentaryo sa pundong supply sa petrolyo sa dili pa mopataas sa presyo sa dihang may anunsyo sa international ug national nga mga pagtaas sa presyo; pagpataas ug gahin sa panglawas hangtud sa ka-barangayan; limpyo ug luwas nga serbisyong patubig; ug uban pa.

8.  Pagpatuman sa mga Balaod sa Kahapsay ug Kalinaw nga kalambigit gayud ang Katawhan nga diin dili usab magyatak sa mga katungod.

9. Ipahiluna ug Epektibong ipatuman ang Community Managed Disaster Risk Reduction and Management Committee ug Sistema sa kabarangayan ug ang pagbatok sa mga buhat nga mkadaut sa kinaiyahan ug pagsilot sa mga may buhat ug particular sa mga Biktima sa Sendong – ang paspas ug dili pinolitikang pag-atiman sa panginahanglan ug ang pagtugot sa pagtukod ug mga kahugpungan. Kauban niani ang pagduso ug baruganan batok sa Philippine Mining Act;

10. Padayong paghupot ug pagpalig-on sa prinsipyadong panaghiusa sa Tulo ka Katawhan (Moro, Lumad ug Kristiyano) sa Dakbayan sa Iligan ug dili ang pag-intriga ug pagsindi sa kagubot.

Among Hiniusang Gi-endorso kining maong Plataporma sa Yanong Katawhan sa Iligan City:

Ranao TriPeople Movement for Genuine Peace and Development (RTMGPD)

Coalition of Lanao Utility Transport for Change (CLUTCH)

Liga ng Makabagong Kabataan (LMK) - Ranao

Lig-on ug Hiniusang Kusog sa mga Kabus-Dakbayan – Iligan (LIHUK-Iligan)

Iligan Survivors Movement (ISM)

Mamamahimo usab kini nga i-endorso sa uban pang mga organisasyon nga amoa usab nga giawhag.

Daghang Salamat ug Padayon Kita sa Pakigbisog!

Sa Ngalan sa Iligan Peoples’ Agenda,

Rufino Gonzaga, Jr.

RTMGPD

lmkabataan@yahoo.com.ph

221-7393