Mga miyembro sa Anak Mindanao (AMIN) ug Liga ng Makabagong Kabataan (LMK) mipahigayon ug protesta atol sa kasaulugan sa International Earth Day niining tuiga (April 22, 2013). Nagtumong kini nga ipanawagan sa mga pulitiko ug mga botante nga himuong sentrong agenda sa piniliay niining Mayo 13 ang hisgutanang kinaiyahan. Nananawagan usab kini nga ibasura na sa hingpit ang Philippine Mining Act ug i-regularisa ang pag-gamit sa mga natural nga rekursos sa kayutaan sa nasud ug Mindanao.
Gibalik-tan-aw usab sa maong kalihukan ang kasinatian sa Sendong ug Pablo nga diin hangtud karon hinay gihapon ang dagan sa pagpahiuli sa kinabuhi sa mga survivor ug gani walay bisan isa na lang nga napanubag sa damyos ug kadaot nga nahimo kay tungod man kini sa pagbungkag sa kinaiyahan pinaagi sa mina ug pagpamutol sa mga kahoy sa kabuiran.
Singgit sa maong protesta nga sa matag karon ug unya himoong Adlaw sa Kinaiyahan ug Adlaw sa Katawhan. Matud pa sa LMK Spokesperson nga si Brandon Parpan, “mamahimong walay pulos sa umaabot ang tanan natong paningkamot karon kung ang atong kinaiyahan ug ang kalibutan gusbat na. Kay ang kinaiyahan ug ang kalibutan mao man ang atong kinabuhi. Gani, angay nato tun-an ang kinabuhi ug kultura sa mga kaigsoonang Lumad nga ang kinabuhi sumpay gyud kini sa kinaiyahan. Kung patay ang kinaiyahan, patay ang katawhan. Ug kabahin kining atong kalihukan sa nasudnong panawagan nga TAO MUNA HINDI MINA nga gilangkuban sa lain-laing organisasyon sa nasud. Ug nanghinaot kita nga ubanan kita sa bagang katawhan niini nga kampanya, sama sa atong pakigbisog batok sa oil deregulation, taas nga buluhisan sa mga pagkaon, dagkung pasugalan ug privatization sa electric industry, ug uban pa.”
Dala ang mga placards, flag ug streamer mimartsa gikan sa Tibanga hi-way ug palibot sa sentrong bahin sa dakbayan sa Iligan ang maong kalihukan ug singgit ang pag-establisar na karon pa lang sa malungtarong pagdumala sa kinaiyahan ug himoong hagit sa mga botante ug pulitiko ang hisgutanang kinaiyahan.
Ang Anak Mindanao (AMIN) Party List usab matud pa sa plataporma niini nga iduso gayud ang pagrepaso sa Philippine Mining Act o Republic Act 7942 nga diin nagtugot sa lapad ug dinagkung pagbungkag sa kabukiran (open-pit mining). “Kining balaod sa mina dinhi sa atong nasud mas nag duot sa katawhan ug mga komunidad nga mabutang sa dakung peligro ug kadaot ug saksi man kitang tanan sa mga katalagmang milabay na sama sa Sendong ug Pablo. Matud pa sa kagamhanan, magdala kini ug kalambuan sa atong nasud ug mga komunidad apan kung itandi ang kadaot nga hatud niining maong ekonomikanhong programa mas daku ug mas grabe, mao nga angayan lang nga ibasura kining kasamtangang balaod sa mina ug iduso ang bag-ong balaod sa pagdumala sa atong natural resources sama sa Alternative Management of Minerals Bill uban sa pagpatuman ug mga programa ug polisiya nga magpalambo sa local nga ekonomiya apan dapat sustenable usab,” matud pa ni Jun Gonzaga, Chairperson sa LIHUK-Iligan ug coordinator sa Anak Mindanao Party List sa Iligan City.
“Aduna gayud angay nga usabon sa nagtunhay nga sistema sa pagdumala sa atong ekonomiya, kinaiyahan ug politika nga nahimong paborable sa mga ekonomikanhon ug politikanhong gamhanan uban sa ilang mga langyawng kauban ug collaborators, daku kini nga buluhaton ug sa hinay-hinay atong usabon kini. Unang lakang sa hisgutanang kinaiyahan mao kining pagbasura sa kasamtangang balaod sa mina sa atong nasud ug ang padayong edukasyon ug walay hunong nga kampanya,” dugang ni Brandon Parpan.
Pareho ang duha ka organisasyon misaad nga paglunsad lang kini sa kampanya ug ipadayon kini uban ang lain-laing mga kahugpungan sa tibuok nasud hangtud nga mawagtang ang kasamtangang balaod sa mina sa nasud ug mapasa ang alternatibong balaudnon. (Limbag Malayang Kaisipan. 23 April 2013)
Elizabeth Padilla
Chairperson
Walang komento:
Mag-post ng isang Komento