Hulyo 22, 2013
Karong Hulyo 22, 2013 mobatbat na usab si Presidente Benigno Aquino III sa iyang “state of the nation address” (SONA) o ang pagpadayag sa presidente sa nasud sa kahimtang sa nasud Pilipinhon. Kini mao ang ika-upat nga pagpahayag ni Presidente Aquino sa matag tuig nga mahuman sa iyang unom ka tuig nga termino sa pagka-presidente sa nasud Pilipinas. Sa kasinatian sa milabay nga tulo ka SONA kanunay ipamahayag sa Presidente ang mala-rosas nga hulagway sa kahimtang sa nasud Pilipinas. Pipila niini mao ang giingong pagtubo sa ekonomiya, pagbatok sa kurapsyon ug pagsalta sa kahimtang sa ubos nga katawhan gikan sa kakabus ug kawad-on.
Kanunay nga ibida sa presidente ang tubo sa ekonomiya sa natala nga porsento sa “gross domestic product” kung GDP o “kinatibuk-ang produkto sulod sa nasud” diin sa tibuok tuig 2012 mitala kini og 6.8% ug karong unang kuarto (quarter) sa 2013 mirekord kini og 7.8%. Tinuod nga daku-daku kini nga porsento apan naobserbahan sa akto nga kahimtang sa ubos nga katawhan ug naghagong hut-ong nga walay kausaban ang kahimtang sa ubos. Tungod kini kay ang abot ug tubo sa produksyon sa ekonomiya gikumkom lang sa pipila ka adunahang pamilya/indibiduwal nga magpapatigayon.
Ang mga adunahang sa nasud nga naglangkub sa 15% hangtud 16% sa pupolasyon sa Pilipinas ug kini sila lang ang nag-angkon sa 60% nga kita sa nasud nga nagpatubo sa GDP. Sa tuig 2011 kuarinta (40) ka pinakadatu nga pamilya sa Pilipinas (Forbes Wealth List) nag-angkon sa 76% sa tubo sa GDP sa nasud. Samtang ang 84% hangtud 85% sa pupolasyon sa nasud nag-ilaid sa pag-angkon sa 40% nga kita sa nasud nga gitala sa GDP (NSCB).
Bisan pa man nga nakagasto ang goberno og P6.9 bilyones hangtud sa Pebrero 2013 mitala gihapon ang gigutom nga pinakapobre sa kabus nga katawhan og 3.9 milyones ka pamilya o gibanabana nga 19.5 milyones ka tawo sa unang kuarto karong tuiga 2013. Mitubo kini og 600,000 gikan sa imaging kuarto (SWS). Dili kalikayan nga modaghan ang kabus tungod kay sa natad sa panarbaho mitaas man og 7.5% ang tanto sa walay trabaho (unemployment rate) sa bulan sa Abril 2013 (NSO).
Sa tulo ka tuig nga pangagamhanang ni Presidente Pnoy Aquino wala pa mahimutang sa tul-id nga dalan ang katawhang kabus, nagpabilin kini sa kakabus ug midaghan pa gani. Walas puas ang wala ug tuo nga anumaliya ug kurapsyon sa pangagamhanan anaa ang bag-ong mibuto nga P10 bilyones Pork Barrel Scam ug P900 milyones Malampaya Fund Lost. Naglambigit kini sa mga mini nga NGOs, busa uban sa mga tinuod nga NGOs nanawagan kita karon sa pagwagtang sa Pork Barrel Fund o Priority Development Assistance Fund (PDAF) sa mga Senador ug Kongresesta.
Ang mayoriyang kabus nga katawhan nga giingong Boss ni Pnoy wala pa makabati nga Boss sila sa mga opisyales sa kagamhanan. Daghang mga makatarunganon ug demokratikong interes ug pangayo sa mabagang kabus nga katawhan wala pamatia ug buhatan sa mga suloguon sa katawhan (pinili/tinudlo nga opisyal sa goberno). Gipatuman hinuon ang pagpamahal sa presyo sa elektrisidad ginamit ang pagpangilad nga kakulang sa suplay sa elektrisidad ug tinuyo nga pagpalung-palong sa suga.
Ang pagpatuman sa kabubut-on sa mayoriyang kabus nga katawhan (ang Boss), nga mao untay hulagway sa demokratisasyon sa katilingban nagpabilin nga idlas ug dili pa matagamtam sa katawhan. Ang kagustohan nga pamaagi sa katawhan sa pag-angkon sa kalinaw dili mao ang gihimo sa kagamhanang Pnoy, nagpabilin nga ang gusto sa Malacanang sama sa nanglabay nga kagamhanan mao ang matuman sama sa pagpili og gobernor sa ARMM. Kung kinsa ang paboran sa Malacanang mao ang molusot, wala nay tinuod nga kahulogan ang ilang eleksyon. Sa panag-estorya sa kalinaw puros lang mga lider ang nag-estorya, ilabina sa bahin sa kagamhanan puros taga Luzon, wala gani kini konsultasyon ug pagpahibalo sa mabagang yanong katawhan ilabi na sa Mindanao.
Busa dili malikayan ug mabasul ang pag-alsa sa ubang grupo o katawhan, ang MNLF, BIFF, Lumad ug ubang rebulosyonaryong grupo. Ang nakadimalas pa niini kay ang mabagang katawhang sibilyan sa Mindanao ang mag-antos kung adunay kagubot samtang luwas ug nagpaharuhay sa Manila ang mga lider sa Panag-estorya sa Kalinaw nga taga Manila o Luzon.
Dili makapagpakahilum ang ubang pundok sa katawhan, ang anaa sa simbahan sama sa CBCP nanawagan kang Presidente Pnoy nga mohimo pa og daghan alang sa kabus nga katawhan. Kinahanglan moduyog ang mabagang naghagong katawhan Lumad, Muslim ug Kristiano sa mga demokratikong kalihukan sa pagduso sa mga makatarunganon ug demokratikong katungod ug pangayo. Ipamugos nga sundon sa mga suloguon sa goberno (pinili/tinudlo nga opisyal sa goberno) ang kagustohan sa ilang Boss nga mao ang mabagang yanong katawhan
Walang komento:
Mag-post ng isang Komento